11月1日市前分析

今日午後無進一步跌落去確實有少少失望，今日落到去680就即彈返上黎，
我都呆一呆，即刻去睇下圖係咪畫漏野，結果真係漏左，漏左條日線圖由9/16引伸出黎既橫頂。基本上一條阻力要上穿及下破一次先會失去阻力既作用，及後再做左條小型升軌跌唔穿，所以最終o係佢穿左條下降軌後我就止賺走左。如果大家o係穿19724開淡基本上遇到支持並升穿一條阻力就要止蝕。之後都係行一條長方形，升穿橫頂爆升..........................................等等等..
總括係，我又多一次線可以用了! 嘿嘿.....!^^


聽日會點呢 ? 依家想做好做淡既位都有，不過個水位好少。
先講做好先，有條小型降軌，升穿都可以小小地做好，聽日o係19870左右，穿左上望20000，再升穿就係20230了，之後就睇100天線20390左右，再穿埋就應該21000了。
另外做淡的話，可以睇返今日DL 19680，跌穿就會落小升軌，聽日第一個鐘大約o係19510 (今日午市分析寫左錯，收市應該o係480左右)
穿19510就會落返去19000了。

暫時睇如果個市係要跌的話，水位會多D，因為始終之前升得太急，無乜做整固，所以無乜阻力位可以依靠，但做好做淡都切記唔好心熊，到左目標位就要留意反彈力道，隨時準備食糊。

10月31日午市分析

今日淡友終於發威，個市終於叫做識跌下。
係一件好事，因為要有整固先會有線位同圖形。
今日跌穿左19940時唔知有無人開左淡倉 ? 有就恭喜晒 ! 我都head住廿幾格 ! 哈哈...

講返圖先，小時圖穿左裂口後就直落19750，而19724有條9/9延伸出黎既橫線頂住，
如果跌穿埋的話，就會向下面條小升軌進發，午後大約o係19420，收市會o係19550左右。
穿埋的話就要落19000了。
另外，分鐘圖顯示依家行緊條下降通道，所以如果開左淡倉既朋友可以以佢升穿下降通道為止蝕或止賺，你貪心D唔信邪既就以19900做止蝕止賺都得。
總括講，淡友要留意遇支持位時既反彈力度，隨時準備食糊。

而想做好的話，暫時無乜位做住，等多D圖形出黎先有得諗，或者穿19900時小注做好炒下DT都得。過夜就唔建議了，因小時圖macd剛剛轉負數，轉弱中...

有感而發

點解開個有感而發既主題呢 ? 因為近日一直係咁出分析，盡量都偏向唔好追牛，
但個市就一直係咁升，我o係度諗，如果我係睇開依個BLOG既，會覺得點解依條友o係個市升得咁勁都仲好似睇得咁淡咁~ 如果係我，我一定好不滿 !
首先唔講圖住，環球經濟到依家為止都仲係好差，所謂既解決方案咁都叫解決左嗎 ?
依家就好似繼續吹緊另一個泡沫出黎，所以做睇得太好都只係自己呃自己。

如果講圖，當破位就要上車，如果無及時上車想中途上車的話風險係好大。
打個比如，一架巴士停左o係站度你上左，最多o係佢行完盡頭返返個站你落返車都叫無蝕。
但如果你無上，等架巴士行緊既時候你先中途去上，你諗下o個種風險o係邊 ?
最大問題係你都唔知下一個巴士站o係邊 ? 所以我先成日講唔好o係中間入市。

同埋近期既分析好有無寧兩可既感覺，做好又唔係，做淡又唔係。
無錯，因個市確實係無寧兩可。到現時為止我都未真正入市，都係用幾百至幾千去玩下。
而我分析出黎既資料只係想俾想做好或做淡既你有一點大概，俾多一點資料去俾你諗一諗。但最終都係要靠自己分析同衡量風險。認識多一點技術分析、認識多一點炒股方法，整合一套自己的買賣規則，才是王道呢 !

10月31日國企市前分析

我有個朋友叫幫我佢分析埋國企，咁就試一試啦~
其實我每日只睇恆指，所以對恆指圖比較熟，國企唔太熟，可能會睇漏好多野。

先睇日線，同恆指一樣，都係面對緊條100天線，亦都係定緊係咪行緊依條下降軌 ?
依家條線大約O係 10980左右啦。
但如果升穿，就應該會向第一個平頂11170進發，穿埋就會到11450裂口。

而小時圖，向上既都係一樣，而向下既可睇10600，跌穿就應該會下試10200。

做好既，升穿10980可做，但止蝕擺o係10600，係有點風險，但等佢行一段時間之後，會有條新既升軌出現，咁就可以降低風險了。
做淡既 ，跌穿10600都可以小注做，止蝕同樣係100天線位置。

10月31日市前分析

星期五午後都仲係o係19950~20100之間橫行，悶爆。最後仲收十字星。
係咪即係出現轉勢格局呢 ?
如果我睇成交加走勢，星期五係派貨格，大成交但整體係向下的，不過都唔代表可以穩陣做淡住。

首先睇日線圖，剛剛我拉左條下降軌底部出黎，再拉條平衡線上頂部，發現線位剛與100天線重叠，意味住如果佢升唔住100天線(約20370)並回落，咁就好大可能係行緊依條降軌。

而小時圖，感覺上有少少圓底FEEL，但都唔係好肯定。有條小型升軌，11點左右就會跟裂口底重叠，如果到時仲係橫行緊就可以唔洗理佢了。

咁想做好同做淡點部署呢 ? 其實依家做好做淡都算係有線位了。
想做好既，穿100天線都可以做好，上望20530左右， 穿埋的話，咁就真係好大機會直奔21000了。
但依家小時圖RSI有成89，當真膽搏膽 。
想做淡既，最近當然係19940裂口，跌穿就會落19750，但要提防條小型升軌會唔會頂得住。
不過經驗話我知，裂口比條小升軌阻力大，穿得裂口就應該會跌穿埋小升軌，當然十一點後先穿裂口就當然唔洗理佢啦。19750之後就會落去挑戰中間升軌19400左右。
入左牛既，可以19950做止蝕。
入左熊既，可以DH 20270或100天線做止蝕。

暫時局勢開始走向明朗，至少我等左好耐既裂口位終於出現，而亦有一條疑似降軌。
條降軌其實都好大機會係O岩架喇，因升降軌好多時會拍住移動平均線一齊行。
下星期睇住做野啦!

另外我前日話美股下望12000，暫時目標不變，
但尋日收十字星，睇返歷史，美股開大陽燭後再收十字星，好多時下一枝燭都係陽燭，
所以做左淡既人要注意。當然如果佢開長陰燭就係黃昏之星，利淡啦 !
但睇線位，如果美股升的話，有機會上12320，上穿埋就不得了了.....HAHA!

祝大家下星期盤滿苯滿 ! ^_^

10月28日午市分析

今日再夾300 , 不過我都係觀望中。
依個浪食唔到確實有點可惜，不過機會多的是，小心為上要緊。

暫時睇小時圖有條三底橫線支持住個低位，咁即係話跌穿19950可以試下做淡，
止蝕的話可以擺返o係分鐘圖既下降軌，唔想太近止蝕都可以擺o係20100的。
穿左就下望19750
而做好的話，都係o個句，風險幾大下，但升穿條即市降軌都可以試做，20100都會一條橫線位，升穿都可以做，止蝕可擺o係19950。會做好上望幾多真係唔識答

另外美股圖受之前既升軌所制，做左個倒轉搥仔型態，有機會短期見頂。
不過摸頂有點危險。只係一個給大家的資訊~
下望12000...

10月28日市前分析

今日一口氣殺上19700，由18300開始真係一口氣，回都無回過，確實好少見。
會係因為結算而挾淡 ? 定真係牛市 ? 真係唔知了。

暫時要睇住兩個圖，即月同下月，因為聽日就結算了。
如果由升穿250上升頂入貨到依家既當然要恭喜一下，不過依六百點真係唔係我賺。
哈哈......
依家大家最想知既，就係究竟邊度先係頂 ? 而我唔追牛，都係因為我都唔肯定邊度係頂 ?
同埋離止蝕太遠了。

即日小時圖有條上升通道同埋之前三底橫線，如果聽日升得穿19722橫線，應該會上三底橫線(約19950~20000左右(隨時間而上)，而下月期則o係20050左右，就睇下如果上到依D位會唔會有返個似樣少少既調整吧 ?
如果真係再上，就睇條黑色線，可算是牛熊分界了 ! 聽日大約會o係20550左右 !
而短期有一條小型既上升軌，如果跌穿都可以"小小地"做淡，下望下一條升軌，止蝕可先定o係三底橫線 (如果無升穿的話)
聽日開市條升軌o係19600，兩個圖都係，隨時間而上。
而中間條升軌開市會o係19130左右。大升軌則o係18600。

有少少主觀意見，依家有少少似八月尾至九月一挾上21000既情況，
依兩三日就好好留意下走勢會唔會相似 ?

另外，依段時間無論做好或做淡都應該盡量控制少D注碼，因為你唔會知佢想夾幾耐，無啦啦夾完好有可能會有一個好急既調整，始終一口氣未做過整固既衝上去真係有點似趕期結咁款 !
總之萬事小心啦 !

10月27日午市分析

今日終於承受偷步既惡果，本來開市都仲走得切
o係公司樓下等 lift 時都仲跌緊，返到公司已經升百幾，咁唯有等上止蝕位止蝕 ~
真係要返樸歸真唔可以偷步 !! >.<

今日已經升穿左上升楔形頂，即意味住上升楔形圖形已破，之前我都講係差一個頂先成立，
依家已經好明顯=.=
但係我差D唔記得，依家轉緊倉，即係我要睇埋下個月既期指圖，
一睇就發現一樣好重要既野，大家都見到，下月個圖既上升楔形係未穿的，剛剛到左頂部，
所以意味住都係唔好做好住，陣間我都係放左隻牛穩陣...HAHA~
如果真係遇阻力回落，咁就確認到係做緊上升楔形了。
但係咪做淡呢 ? 等穿左條小型上升軌先，剛剛先講完唔好偷步...HAHA...
穿左就可以下望上升楔形底部了~
(小型升軌下午會O係18984，大升軌O係18450左右，頂就依家貼住左唔洗講啦!)


另外如果真係下月期指都破埋圖形，咁好大機會會殺上19650左右。
但RSI做緊双頂 (第一個頂O係9/1)，所以大家都係自己衡量風險了。

10月27日市前分析

今日下午開市急升上191後回返落黎，之後又再夾上191
過山車到暈，所以我平時都講，指數無勢頭之分，跌得再急，越支持都會即反彈，
千祈唔好見佢跌得急就走去追，分分鐘你追到時已經係水尾。
反之亦然。

今日其實已經到左我第一個心目中既頂位191，而我覺得港股頂到盡都係去到19250左右位置，所以就算升穿今朝既平頂我都無入貨，因為水位實在太少，太唔安全喇 !
暫時大勢都無乜大變動，都係等破位。
想做好既，老實講，暫時無乜位做，或者升穿19250吧，不過都唔係太安全，因為通常升穿升軌頂，都會好快回落。
反而想做淡的話有個幾近既位，今日小時圖畫左條三底升軌，跌穿就可以做了，聽朝第一個鐘會大約O係18900，下望18700，可以以今日DH 19130做止蝕，風險唔大。
如果咁好彩跌穿18700的話就睇上升軌18450了，跌穿埋就真係正了，應會有1000~1500點跌幅~
另外，小時圖再一次做緊MACD背馳，上一次上18900時又係做背馳，又係上升楔形，但我錯過左個600點既浪，希望今次唔好錯過就好了。

PS : 今日我摸頂入左熊過夜，都幾大風險，好似有點不智 !! 哈哈....

10月26日午市分析

尋晚美股急跌，我諗會有好多人今日一開市就沽吧 ?
之後俾大市夾到咁.....都應該五癆七傷了。
但如果會睇圖，至少唔會追沽，因為仲係o係中間，最起碼都穿187先入一注啦。
今朝最低見18703呢....

大市午飯前一大枝避雷枝吉上去190，午後會唔會有機會再殺上去呢?
先睇睇五分鐘圖，見到由18900開始做緊圓底嘛? 之後一穿頸線就夾上去。
其實穿頸線前一分鐘圖已經吉穿左個三角形，已經有預兆會穿頸線去爆，今次爆升其實係追得到的。大家最好研究一下。

依家分鐘圖好明顯行緊一條上升通道，如果以咁既幅度去行，
要行到19200我諗收市前應該差唔多。
但如果跌穿條升軌都好有機會打回原形去返187。依家升軌大約o係18880左右吧..隨時間而上.
而小時圖有條橫線咁o岩壓住依兩日高位，升得穿的話應會上191~192。
但對上水位真係唔多，所以做好既要小心點。

而我今日都係DT下，主要都係等.....等機會.....!!!

暫時都係睇得比較淡，因我覺得升到192已經好盡了
但如果想穩陣做淡，當然係等跌穿小時圖既上升軌啦，依家大約O係184，相信跌得穿的話會急插。

10月26日市前分析

今日悶左大半日，臨收市黎個反高潮，最後仲衝穿19000，強。
依家既圖暫時無咩大變動，無論位置上及圖形上
剛剛收o係中間。永遠收o係中間都係最難估。
不過既然破左位，如無意外都會上軌頂，即19230左右
如果真係上，到時睇下係咪會有阻力吧 ? 咁就可以更加確認係咪行緊上升楔形。

但如果聽日低開，咁就要睇返18700左右，跌穿的話再落183或升軌底既機會都好大。
如果聽日仲係o係187~191之間遊走，咁我都繼續觀望算了 !

另外，好友唔好太過心熊，近依幾日升市都不夠六百億，真係少得可憐，可能只係夾倉。
有賺既要諗諗倉糊了。

題外話 : 今日尾市入左隻立米熊，10000股，0.068，共$680...夠晒立米。聽日會唔會有機會變微米熊呢 ? 哈哈...

10月25日午市分析

可能係有大新聞將出台吧 ? 個市超悶焗 .
不過圖都要照畫~~~~

個市好似無乜力咁，189穿下上去又落返黎，始終189~190之間真係會好chok，所以我先唔入貨。依家都只係唯有等啦。
睇睇小時圖，有條小型上升軌支撑住，午後應該會o係18900左右，即係如果下午上唔到去189，咁都好大機會會試返187依D位了。
另外五分鐘圖都剛剛跌穿左升軌，証明個市真係無乜力。
但如果入熊既都要小心，始終依兩條軌都係剛做出黎，就算跌穿都唔代表會大跌，
如果要大跌，起碼都要跌穿條大升軌。依家o係182左右，收市o係18260左右。
即係想穩陣做淡都要等下，而做左好既，我諗上穿唔到今日DH都放左佢先比較好了 !
賺錢緊要 。 hahaha....

10月25日市前分析

今日港股都係發威，但係又威唔盡，硬係唔去穿189平頂 !
最後我都係食左少少牛走左 !! 因都講過今日唔會過夜 !!

我今日諗左好耐，唔通個熊市真係完左 ?
無錯，我到依一刻仲係一個淡友，淡友因子根深柢固，所以諗左好耐，最終都畫左條降軌出黎，哈哈。
不過我都係以圖論圖，盡量保持中立的。

大家見到幅圖，總共有兩條上升通道、一條下降通道，一條189平頂，一條18370平底。
首先先講上升通道，有分藍色同綠色兩條，綠色係已確認的，
藍色尚代確認，但藍色升軌頂跟綠色升軌底形成一個大型上升楔形
係一個利淡走勢，不過要等佢跌穿升軌先開得淡倉
聽日底部係18200左右，而頂部則係19170左右。
如果真係跌穿底部，應會有1500點左右跌幅，但個通道仲好闊，應該要行多好幾日先會有結論呢。而藍色既升軌底係我估的，要到位先確認。而跌穿綠色升軌就好大可能會落藍色軌底做支持了。

另外條啡色降軌又係咩黎呢?! 都係估出黎的。
係由8/9 ~ 10/4既降軌底部拉出條平衡條做頂!
而條降軌頂成唔成立，我諗依兩日會有答案~
聽朝條軌頂會O係19000左右~隨時間而下.

驟眼看對上主要阻力有189、190，未開好倉既可以穿189先行入一注，穿190再入多注吧。
保險D既止蝕位定返189都得。
而想開淡倉的話，我諗要跌穿今日dl 18350或條升軌先好開了。

港股無可否認已轉勢，除左我估既o個條降軌未穿之外，
差唔多所有可畫既降軌都已經升穿晒，
依家會開始行緊一條微斜既升軌，我當我畫o個條降軌係無效的話，係咪代表港股會急速向上呢? 又未必...
有升軌既意思就等於，只要一日跌穿，就會有一個較急勁既跌勢，但千祈唔好胡亂做淡 !
各位小心睇位入市吧 !

10月24日午市分析

今日港股勢兇夾狼呢...同美股一樣~~
今朝摸頂不成，輸左5格 (但我出POST寫15格T_T)
不過O係670反手牛，叫做打和緊~~HAHA

先睇圖
今朝穿埋650後，就應該會上189平頂了，穿埋的話，就應該會上另一條降軌 (大約O係191)
依家日線圖好明顯行緊一個大型既上升楔形，即係話依家都仲係走勢偏淡
只要一日跌穿升降，就會有一個頗大頗急既跌幅
所以做左好都唔好太過心熊。
依家上升楔形頂都係O係191左右
而止蝕位如果定O係條升軌又太遠，咁我都係定返O係650好了!

10月24日市前分析

估唔到今星期最後一個交易日，係可以悶到咁，真係不得不服了。
尋晚我見美股咁勢兇夾狼，所以今次我會分析埋美股圖呢。
(Nahcire問我美股係咪會升，好彩我唔係答唔會姐..HAHA..但佢一晚就升晒我所講既水位=.=)
順帶一提，我講既港股係期指，唔係恆指，所以可能有D朋友會睇到一頭濛水吧? HAHA..
好，言歸正傳。

先講港股先 :
睇IG好睇ADR好，港股都係會高開250~300點左右，咁仲追唔追好呢?
其實都係按返依幾日策略，阻力分別係18100、18180、18280、18420
換言之，如果高開低過18280會最好，因為最多水位，等佢破位就可以牛喇 !
但如果高開得太近420，咁我唯有等佢穿420先入。
420打後有兩個阻力，分別係裂口650、降軌580左右(隨時間而下)。
如果兩條都升穿晒，其實對上仲有一條，不過都幾遠下，o係19100左右。
咁即係話，只要升得穿650，之後起碼仲有400點可以食。

如果想做淡的話，小時圖有一條小型上升軌，跌穿都可以小注試下，依家大約位置o係17960(隨時間而上，收市大約會o係18040左右)。
穿左就下望17766裂口喇。

到美股了。
尋晚美股發威，一口氣升穿長方形頂同第一條 hamline**
咁會唔會仲有得升呢 ? 係咪熊市已經完結呢 ?
先睇一睇小時圖，好明顯11620同11400係一個長方形走勢，如果量度幅度的話，破位的話應該有220點左右升幅，即理應道指可升致11840依D位 (依家已經1180X 了)
另外亦見到道指行緊條上升通道，點數亦到左軌頂，依個係第一個需要注意的。

再睇睇日線圖，中間有兩條線，就係我所講既HAMLINE喇 !
尋晚已升穿一條，咁星期一如果升穿埋另一條，美股真係會好大機會真正轉強。依家條HAMLINE大約O係11840左右
之不過，基於三個理由，我覺得美股好大機會已經見頂。
1. 以破圖後既波幅去計，11840剛好係破位後既量度升幅。
2. 小時圖已經到軌頂
3. HAMLINE係需要好大既反彈力先可以穿，但無左圖形幫助，又有上升軌頂既阻力，要升穿佢，實在太難了。

基於依個原因，星期一美股好有機會回落，所以我唔建議持牛過夜。
但持熊嗎 ? 咁即係偷步，梁錦松偷步買車最終後果係點樣 ? 哈哈...
所以你可以偷步，但要承受返一定既風險，始終確認升唔穿先做野會比較安全。
因為如果真係升得穿的話，個市應該已轉勢，你隻熊仔就真係凍過水了。

**HAMLINE - 係以之前既兩個頂或兩個底連成再橫穿整個圖，係一條有好大支持或阻力既線，可以當為牛熊分界吧。

10月21日午市分析

今日個市, 悶到不得知鳥。
整日係o係個長方形度上上落落(18100~17920)左右，都係等緊突破~

向上既, 上穿18100都可以少注牛, 不過水位唔多, 第一站睇返小時圖裂口位18180左右
向下既, 下穿尋日裂口17890, 就可以睇返17766尋日DL, 水位會多少少~
暫時同尋日分析無乜大改變, 都係睇位做野啦.
不過整固越耐, 我覺得越似整固向下. 但今日無乜位偷步, 哈哈
都係等下啦!!!

10月21日市前分析

下午確實係鋒迴路轉，穿18930後一路殺落去裂口橫底17766，
就真係o係17766即時返彈，共反彈左二百幾點
依條裂口橫底可真夠硬。我都走左一半熊，我老豆個acc直頭走晒貨添。^^

咁有熊過夜既又點睇呢 ?
圖上我畫左兩個圈，同埋加左兩條紫色橫線
紫色橫線應該會係短期阻力，但有幾強就要試過先知，如果係尋日開淡倉過夜既，o係穿第一條紫線後放貨，應該都仲有賺。第一條紫線係18180左右，再對上一條就係18280。睇下聽日開o係邊啦! 升穿先止蝕都可以 (當然都唔一定升呢!!)
而我都係等返420，最多當打個和 !! 哈哈 !!

另外o個兩個圈又係咩黎呢 ?
又要俾少少幻想力喇 !
我寫好晒1~5
1. 由高位跌落去尋底
2. 尋底後回彈上阻力位
3. 遇阻力後再尋底
4. 再尋底後回彈上阻力位
5. 阻力位下整固再跌

基本上由18900跌落黎既版本同第一個圈既暫時一模一樣
意思即係暫時仲未可以擺脫整固向下o既狀況
要真正擺脫的話，一定要升穿18420條橫線，而條大降軌一直而下，420對上有650橫底同大降軌，所以回收價o係650以上既熊証暫時係無需要太擔心住
但聽聞今日出左隻185既熊証，咁我就建議如果聽日真係升穿第一條紫線就先行止蝕，
待確認真係整固向下時先再入市
我講過買証唔好買得太近回收，因為真係無時間俾你去考慮止唔止蝕，你係迫住要止的。
因為保留子彈先係最重要。只要打一次靶你就無得返身架喇 !

當然，聽日唔一定係升市既。如果係跌市，咁就應該會再試17766依條橫線了。

如想做好的話，都係升穿420先，不過都要係少注加唔可以過夜。
因為要升穿大降軌先可以確認轉勢。

10月20日午市分析

今日對我、對追開我POST既人黎講都應該係開心既一日
因為尋日做左個算係o岩既決定，就係熊仔過夜。
哈哈，依家head住三十幾格。正 !!

講返圖先，今日整左兩幅圖上黎，一幅係期指小時圖，另一幅係美股日線。
先講期指圖 - 今朝好明顯係受條升軌所制，如果仲係吉倉既話，跌穿依條線都可以做淡。
條線依家o係17940左右吧, 跌穿後就會落17700線色橫線, 穿埋就174......
今日唔知可唔可以去到177呢??
而暫時止蝕都仲係擺响18420先。
止賺位 ? 我都過夜喇 ! 唔諗住 ! HAHA...

美股圖 - 點解講美股圖? 因為我想解釋一下點解我尋日會搏熊。
現美股做緊一個上升三角，亦似做上升楔形,
平頂位之前衝左四次都衝唔上所以好肯定好大阻力，就同港股184依個位一樣
我先入為主先先覺得港股唔會衝得上184，所以就覺得美股唔會衝得穿11650依個平頂.
而依家睇決定尚算正確 (當然仲有其他因素啦 ! haha )
尋日做左支小陰燭，連同前日既陽燭，剛好做了一個六月懷胎格，即係美股已有轉勢訊號。
所以我今日隻熊又過夜了，希望今次個決定無錯啦 ! 哈哈 !!

另外如果咁唔好彩做左好既朋友又點呢 ?
坦白講，穿182就應該要走，如果仲未走，睇下今日穿唔穿179，穿埋的話就真係要止蝕了。
保住子彈緊要，止蝕要狠心D，止蝕後唔好即刻入，整埋一下自己心情，等下一個TRADE既機會。我成日都講一句，中間先黎入市，好易會俾人CHOK走的。

10月20日市前分析

今朝俾渣打激親, 嬲左成朝~haha
攪到無出午市分析.........
到依家都仲嬲嬲地~~激死我....

今日個市超悶, 上又上唔到, 落又落唔到,
一整日都係o係182~184中間遊走
不過圖形開始出了
18420已確認係一個大阻力, 暫時仲守得住, 但如果穿左的話
所有淡友我諗都一定要cut lose (包括我)
升穿後下一站會係18650左右
而對上o個條降軌, 如果升得穿, 連續左兩個月既大跌勢真係應該完了~
到時我依個大淡友都要轉返做好友~haha
聽朝開市, 條降軌會o係18770左右, 而收市會o係18720左右
突竟係見頂回落定熊市完結呢? 最快聽日應該有答案!

另外向下既, 短期阻力有182, 暫時睇穿182的話就會挑戰180.
咁成個圖形就會似之前我圈住既整固向下圖形, 即應會有新一輪跌浪
所以聽日應該係會幾關鍵既一日......(應該唔會又係橫行吧?)

我今日入左熊, 其實都幾搏, 不過富貴險中求呢!!!
以十幾格搏幾十格, 始終覺得有so~
同埋炒股最怕唔知幾時止蝕, 依家有晒位俾我的話咁又唔算好高風險!
哈哈!!!

10月19日市前分析

今晚咁夜先出分析，因為剛放工無耐，仲要係食麥當當咋..T_T
頭先唔知係咪做得太攰，o係公司昏迷左個幾鐘無晒知覺。
都係要休息多D至得.....


今日跌到落我第一個目標位, 18000已經平左了!
大家有無執呢?!

今日畫左兩幅圖上黎，一幅係期指小時圖，另一幅係匯豐圖
先講小時圖：
首先先睇線位，今日裂口開後一直向下插，仲插穿埋１８０００添
但點解會反彈呢？見到有條線升軌嘛？即係話依家形成左個大既平衡三角,
亦即係話港股o係依兩三日內都會o係依個三角內走，穿邊邊就買邊邊。
如果再穿多次180，咁就會向 177，175，最後174進發。
如果穿174，會再來臨一次大跌，直向15000，所以174依個位好重要。
向上的話，見到兩個裂口阻力，如果穿到上去18440，咁就會直到18650，穿埋就會挑戰多次降軌。有無可能上到去 ? 主觀去睇，有。點解 ? 睇睇下一段先。

有見到我圈住左兩個地方嗎 ? 有無覺得個圖形好似 ? (俾少少幻想力，唔該^^)
第一個圈係見頂後回落，之後裂口低開尋底，尋底反彈於裂口阻力行人止步再向下破底再尋底。依家恆指個勢就係咁，所以我覺得會上多次18650，但係咪即係要牛一牛佢 ?
你輸得起的話係可以，但要o係條三角升軌做止蝕，下穿就一定要走人。
而我，如果要做好就等穿裂口阻力先做，定五格止蝕算數。

第二幅匯豐圖 :
有咩好講呢?因為匯豐可以話係帶動恆指升跌，所以先要睇佢圖睇下可唔可以偷步...
見到匯豐穿左條小型上升軌，而剛o係另一條升軌頂住
即係話，黎緊只要匯豐跌穿依條軌都可以入熊。
如想做好，咁等佢升穿兩條降軌先啦。

10月18日午市分析

今日一開就穿晒所有支持位咁濟, 足證大市係有幾咁弱-.- 尋日班財演仲........唉!!!!

請大家真係要吸取教訓, 如果真係想o係股市賺錢, 真係要俾少少心機去學.

就算賺唔到, 起碼唔洗俾人水先~~~~

好...先講返個市~

其實都係無咩好講, 因為都係一個字. 跌!

以小時圖去講, 大市應該會跌落18000左右位置, 而日線圖更加淡,下一個支持位可能係17800, 之後到17400. 

分鐘圖就18200左右有條平底, 如果吉倉既朋友可以等佢穿左條橫底先做淡.

如果想做好, 確實真係無咩位, 等升穿條大降軌再算吧. 依家約o係185左右, 隨時間而下.

淡友止蝕位都可以擺o係185左右..所以如果尋日做左淡倉既, 基本上已經穩賺, 係我就放下風箏先喇!! 即日波幅都唔洗點理佢!!!

第一個止賺位可以擺o係18000. 當然你想貪心d搏佢落17400甚至更低就你地自己諗喇!

另外一提, 匯豐同中移動都已經穿左升軌. 應該會落61.5左右位置, 中移動則應會落73左右

意味住大市係應該仲有得跌! 

ps. 加多張 5 分鐘圖. 今朝就係俾條降軌頂壓位今朝高位. 依家期指o係中間位, 但如果上穿到中間條紅條, 咁就有可能會上返條下降通道頂, 現大約18350, 隨時間而下.

如果真係咁走, 咁我應該會o係18350入熊了!!!

當然都係升穿就止蝕啦!!haha~~

10月18日市前分析

今朝聽個財演講, 今個月會O係21000定20000結算~
我真係想問下佢, 憑咩會上到20000?
憑依家經濟咁差? 憑依家O個反應兩千幾點? 真係想打獲甘既佢...........

好! 講返圖!

今日對我黎講係好好炒, 因為完全係我想佢做既野
全日都係O係上升楔形裏面行, 幾次掂到軌頂就回落, 大勢已現, 跌勢將至.
首先講下日線圖, 今日軌頂O係18850左右, 現收18802, 對淡友係一個好好既消息
期指點數收市收O係咩位, 對下一個交易日有好好既啟示作用的~
小時圖無乜好講, 因為收左O係中間, 就係依個原因所以我無熊仔過夜, 因為佢仲有空間升(當然亦都等於有空間跌啦)
不過值得一提既係, 187條橫線已經俾我刪走左, 因為依幾日點數O係依條橫線度上下來回走左咁多轉, 佢既作用應該已經無左了.

聽日部署 :
大家先留意我特別劃深左既粗線(以下指數係指10/18的)

日線圖: 18870(升軌頂), 18750(升軌底), 18545(大降軌)
以日線圖睇, 聽日只要低開過18750基本上已經可以做淡, 但要小心18545依個降軌底, 可能會越到唔少支持, 當越親支持, 都會反彈反上一個阻力, 去到依個位你想點做, 自己考慮一下.
止蝕位的話, 聽日大約18900吧

小時圖:
上升楔形頂- 19000(10:15) 19025(11:15) 19040(12:00) 19060(2:30) 19070(3:30) 19080(4:15)上升楔形底- 18645(10:15) 18680(11:15) 18720(12:00) 18758(2:30) 19805(3:30) 19840(4:15)
       大降軌: 18510(10:15) 18500(11:15) 18485(12:00) 18475(2:30) 18455(3:30) 18435(4:15)

日線同小線圖會有少少唔同, 即係話, 例如跌穿18750, 之後第一個底可能會係小時圖既線.
但其實唔洗太執著, 因大家唔係DT, 係想食大浪, 所以只要O係邊段時間一破位就入貨就得.
如果一開市就跌穿大降軌當然係正啦, 但如果一開市唔穿, 但又掂住條底條, 咁當然唔好追住, 因以經驗計, 通常會即刻反彈上一個阻力. 例如開18650唔穿落去, 咁好可能會彈返上18750....到時先入都得~

如果做左好, 穿左上升楔形底都要止血架喇. 唔好諗得太多, 唔好諗住只係回一回.
大勢已定.

英股法股德股個圖都穿晒升軌,
依家爭美股, 如果美股收底於11540. 
新一輪跌浪將開始.各位小心喇!!!

10月17日午市分析

開張後第二篇文章, 不過唔知keep唔keep到一日兩章
因要上班呢~~haha....盡量啦!!!

上面兩幅圖都係小時圖
今日個走勢同我尋日講既無乜分別
最正係今日o係通道頂開, 如果我有得玩期指就一開市沽佢落黎喇

我o係187止蝕左隻熊, 因187有條裂口橫線, 唔好貪心, 走左人先最好~
之後又點呢?

今朝期指好明顯受制於上升楔形, 即係好大機會只係托住個市, 唔係真升
所以我都係會以沽為主..大家等跌穿升軌吧!!!

另外我加左條深啡色既線, 係由最底兩點拉出黎既平衡線, 好似有點啟示.
但依條線只係估估下架姐~~~

一句講晒, 宜高沽!!

10月17日市前分析

第一次寫blog, 好似有少少唔慣, 唔知你地慣唔慣呢?!! 哈哈哈
好....開波....

首先, 我講過話有好消息的, 究竟係咩呢?
其實對所有人黎講都唔算係d咩好消息, 因為我只係肯定左小時圖行緊o個個, 唔係頭肩底,
因為我師父同我講差緊個右肩, 咁即係話, 暫時消除左後市將會大升既機會.
咁又點解會係好消息呢? 我諗大家既諗法會同我一樣, 經濟仲係好差, 日日有國家或銀行被降評級, 我叫你牛過夜, 轉頭同你講又有國家被降級, 就算adr升, 你估你訓教仲會唔會訓得著?
所以熊市始終係買跌舒服D.哈哈.....

講返圖,有熊過夜既戰友, 其實我都係建議開市止蝕, 保留彈藥為主要, 因為我睇有機會升上去19000, 分分鐘仲係聽日既事, 但有一個情況可以唔洗止蝕住, 就係一開市就o係小時圖既上升楔形軌頂而未穿的話, 等佢穿先止蝕, 穿唔到, 好大機會會落返18600.
位置:
日線圖: 頂- 18870, 底- 18570左右, 我估計聽日會o係依個波幅上落
小時圖: 頂- 18885(10:15) 18905(11:15) 18915(12:00) 18935(2:30) 18955(3:30) 18975(4:15)
                  底- 18415(10:15) 18460(11:15) 18500(12:00) 18530(2:30) 18570(3:30) 18600(4:15)
1. 我應該會聽朝先放熊, 之後當期指o係o個段時間前去到通道頂, 我就會入返隻熊等佢回落, 止蝕擺o係頂部入市後五格離場.
千祈唔好中間入, 入左後如果回到186可以先止賺
例如10:30升上18900, 我會入熊, 18950止蝕. 如果有幸回到186就放貨!

2. 跌穿上升軌入熊, 驚被fake的話, 你可以睇3x穿o個下既成交多唔多先決定入熊, 唔洗驚入遲. 因為只要一穿依條上升軌, 至少有1000點跌複. 我今日話可以幫大家賺返輸o個d, 就靠依條升軌喇!

3. 好好睇住三點依一刻, 3點咁o岩得咁橋係升軌同降軌既交接點, 會唔會當時即刻跌穿呢? 到時要留意.

4. 大家好似見我睇得好淡咁, 完全無講過會買牛? 無錯, 我係睇得超淡, 點解? 因為頭先我睇左兩幅圖(941 & 5). 可見5號仔已穿上升軌, 而佢應該至少會跌落62.5左右. 941剛升穿降軌, 佢應該會升上78左右依D位, 再睇返歷史, 9/30, 佢地咁o岩就係941-77.7, 5-62.5, 而期指當時做18000左右, 正正符合我睇第一站既點數. 再加上,港股既跌市基本上係匯豐帶動, 941托住. 如果真係會有大升市, 點解會沽匯豐而托返住941? 星期一基本上一定係挾淡倉, 挾幾多點我唔知, 但最多升上去19100就會再有一次大跌市

5. 美股11788係頂點, 一穿依個位, 分分鐘會返返上12000以上, 請問大家有無人會覺得全球經濟可以俾美股咁升法?

最後一句, 圖係唔會呃人, 事實將會擺o係眼前.
明天既止蝕係為左將來大跌市而儲起既彈藥
我好有可能聽日改變主意, 唔沽走隻197熊呢...haha

新開張

牛熊攻略新開章了!! GOGOGO!!