12月1日市前分析

大家好 ! 出post前睇睇IG，傻左..........升緊6XX ! 此刻只能感嘆，點解懶唔去開期指戶口呢??=.=
何出此言 ? 陣間講...

今日下午後曾穿850，但分鐘圖穿左後第二三枝燭就已經上返去，同埋要謹記，都係O個句，穿數字無意義，圖形未穿唔算穿，穿左又上返的話，佢只係多一隻腳咁解，咩叫真穿 ? 至少一枝大陰燭，加無回頭。破位入市有個敝病，係好易摸頂或摸底，要避免依樣野要好靠自己經驗去衡量的。

講返圖，我已經講過穿50天同18000就可以做好，但現貨收市前都穿唔到，無計，玩動物始終係同大戶對賭，佢又點會咁輕易俾你睇到穿位呢 ? 所以我先話感嘆唔去開期指戶口，收市後咁樣夾上去，穿晒位當然要做好啦 !!! 可惜可惜....=.=
咁聽日點做呢 ? 18350係個重要既位，穿左的話之後既阻力係18500、18650、18720、18900，之後就19000了。所以依家就要睇聽日開咩位，都係O個句啦，裂口太大，一開就係阻力位，睇多陣先好入，例如裂口18750，咁要等一等睇下會唔會回返落720，穿左唔代表可以沽，O係720下做一做整固再上，O係720再回一回再上穿先追就最Perfect 了。
止蝕用返最近o個個阻力位

而想開淡的話，未有位，要等 !

我見有不少朋友有熊在手，心情有點低落添...........-.-希望佢地走得到啦!!! 

11月30日午市分析

大家好呢 ! 首先講第一樣野，我依幅圖係下月期指的，同即月有點分別，要留意。

今日真係跌穿50天線，唔知大家有無開淡倉呢 ?
跌穿後即時落埋目標位850橫線，我O係依個位都食左糊了。
依家做好做淡都要再等，做淡既好似水位唔多，
首先想做淡都係睇返下面綠色橫線約17850，穿左之後可以繼續追淡，但跌唔穿上返去就要小心，另外RSI 有條升軌頂住，如果升返上去，好可能今次跌市只係後抽。
如果跌穿後，首先第一個目標係綠色升軌，第一個鐘O係17750，如果順利穿埋就會落17550~17600左右。止蝕都係50天線 (約17970)

想做好 ? 最好都係上穿50天線或18000啦 ! 我諗上穿多次18000後下個目標位就應該係18350。止蝕同樣係18000吧 !

做淡切記切記睇住RSI有無反彈。

11月30日市前分析

大家好呢 ! 今日一開市就穿左升軌，但好快就回返落去50天線做整固再上，
其實依D走勢最好，至少有得即日睇佢破位再追 。都講過，穿左升軌第一個目標就係350，
但可惜上穿唔到。咁黎緊想做好的話，好明顯就係等穿350依個位了，穿後就會上500、650，我自己認為穿後應該可上19000呢。
如果仲有好倉的，定返止蝕o係50天線吧 !
而想做淡的話，跌穿條50天條都應該可以做，目標先睇17850，之後就17600橫線了。
止蝕我諗暫時都係50天線啦~依條線真係可謂牛熊分界呢....

11月29日市前分析

大家好 ! 今日個市又係............高開.....橫行，真係日日如是 ! 無點渣手，過夜真係尤如賭大細=.=

好，先講圖，今日主要受兩個阻力壓住，一係小時圖50天線，二係RSI三頂。
而條降軌聽日第一個鐘O係18130左右。
依家睇外圍咁勁，聽日高開都好正常吧 ? 但都要睇返開咩位先有得追 ! 如果升唔穿降軌就最好啦，可以等佢穿左先追，但如果高開太多，穿降軌後第一個目標應該係18350，如果開得太近，咁我都係會等返穿350依個位先開好倉，暫時未有穩陣既止蝕位...或者先擺18000吧 !
如果真係升穿降軌，近期既跌勢應該已完，長遠少少既目標應該係19000了。
但都要留意100天同250天線既阻力。
最怕聽日又係高開橫行，咁就真係唔知點算 !
切記要小心裂口穿阻力，先睇定點，如果好急咁回返入降軌就千祈唔好開好倉。
同埋要睇住RSI三頂，穿唔到都唔好開倉

如果想做淡的話，暫時無位做，我諗要出多幾隻腳，有條升軌出黎先有得做了 !

11月28日午市分析

大家好 ! 今日又係裂口，又係一開就到目標位，真係唔到我唔服 ! =.=
先睇圖，現暫時受制住條小時圖既 50天線，同埋RSI做左四頂。
所以真係無乜位入，如果升穿50天線可以小注牛，當然最好係升穿降軌啦。
止蝕暫可擺O係17860橫線，穿要走。
降軌收市前會O係18160左右，
我諗我都係等穿降軌先入了 !

吉倉想做淡的話，O係50天線度做，上穿止蝕我覺得風險不大。
但唔知可以睇咩位 ?
而下穿17600先做淡又實在太遠，都係等多幾隻腳出條降軌先再諗做淡吧。

11月28日市前分析

咁又一個禮拜了，總括整個禮拜，我都係食左.....20格=.=
諗返起穿大升軌時應該唔好咁細膽，就算小注過下夜都無防....唉
不過當係一個經驗啦 !
星期五真係超牛皮，穿左位都無反應，所以大家要切記，穿左位又見佢唔係太行就要有食好食，keep住橫行就寧願唔玩好過~~仲有依家個市好似keep住玩尾十五分鐘咁，倒不如末段先黎玩還好 !

好了 ! 先講圖 ! 個市剛剛企左o係中間唔上唔落，吉倉者應該暫時唔好入住，等一等機會啦 !
想做淡既要穿星期五DL 同RSI升軌才做先安全，目標都係17400，水位唔多，自己恆量了。
想做好既穿好色降軌可入一注，望18000~18050。上穿18050後可入第二注，望綠色降軌或裂口18330。止蝕位先擺O係星期五DL吧。

而做左淡既，先睇紅色下降軌做止蝕位，星期一第一個鐘大約o係17850，收市時會o係17750左右。而目標都仲係下望17400先，跌穿就可以睇172了。
但淡友要留意，RSI行緊條紅色升軌， 當RSI掂到條升軌有反彈的話就要走穿左可以再等等。

而做左好的，我覺得客星期五DL都要走了。如果你係買動物，好遠收回價的話，咁就睇返17400依個位穿唔穿先決定啦 !

11月25日午市分析

大家好 ! 今日又係裂口，之後回升，再橫行，睇黎個市真係唔俾人食即市。
如果今朝做左好既，先恭喜你。但如果做左淡，都未需要驚住。

先睇圖，分鐘圖行緊條下降軌，如果做左淡既又未放既，可以等穿依條降軌先止蝕。
而分鐘圖行緊下降平底三角，穿17700可做淡，先望下降軌底部，止蝕當然係下降軌頂部啦!
升穿降軌頂部都可以小注做好，望今日DH啦。兩者都只宜小注, 因實在太牛皮。

另外小時圖需要留意既係，其實依家已做得淡，止蝕可以擺o係新畫既綠色降軌，收市時會o係17890左右，又或者穿即日降軌止蝕。下望綠色降軌底部，第一小時若17560左右，如果跌穿埋就睇17400了。
但要小心RSI，依家RSI有三頂同三底，上穿三頂可做好。上穿18000都可做好。
上望18160，18300。
遇三底時先睇反彈力，唔穿要走熊。穿左就睇提供既目標位啦 !

11月25日市前分析

大家好 ! 近期心情有點波動，希望盡快可以調好啦 ! ^^

其實今日個市唔難炒，最緊要係反應夠快，回彈力同阻力一掂即有反應，所以今日即市係好玩過過夜，只係午後跌落17770 o個浸我仲o係街，無得食。最後o係17900食，賺幾格咁大把 ! 嗚嗚.............

依家個圖都幾明顯，18000係阻力，17750~17770係支持，咁即係話穿邊一邊都可以做好或做淡。先講做好吧，穿18000後先望18330，再穿就望紅色降軌，如果穿紅色降軌的講，中期會走好，目標約破位後1000點即19400左右。 (聽日第一個鐘降軌O係18450左右)
止蝕擺返O係18000先啦 !

做淡的，唔穿18000都可以做，上穿18050做止蝕，如果指數O係中間的話就下穿17750先做，先下望通道軌底17400左右。

最近可能係太夜訓，又食無定時，身體好似越黎越差咁=.=
O岩O岩先O係公司無啦啦頂唔順恰左一個鐘，依一個鐘係全無知覺的，好恐怖~.~

11月24日午市分析

大家好 ! 因為尋晚有點事，無出到分析 ! 抱歉呢 !
先講返今日個市，今日一開市就跌穿左17750橫線，但係點解會彈返上去呢 ? 原來係受到下降楔形軌底既支持 ! 熊左既朋友其實應該上穿尋日DL要止蝕。
而依家18000剛好係通道軌頂，升穿可以小注做好，但要先睇兩個阻力位
1. 橫線18050 2. 降軌18190。止蝕可定返O係18000。升穿晒目標睇18330。
做淡的話依家做都可以，穿18050止蝕，風險不大的 !目標先睇今日DL 17600。
另外尋日尾市我已放熊，今日我1796X入左熊了~~~

另外今朝有朋友問我，佢有隻175牛，好唔好CUT! 我答CUT左先 ! 首先要先講聲唔好意思，但另外亦想同大家講，講左好多次揀牛熊唔好揀太近，因為你係無得揀，一定要CUT的!
以保存實力為主~
但如果你隻係17000的話，咁我會建議睇多陣~至少穿174先CUT!!
希望大家明白~~~
祝大家WIN多D..

11月23日午市分析

大家好呢 !前晚美股跌二百幾 ! 港股就高開一百 !
尋晚美股跌得五十幾 ! 港股就低開三百 ! 尋日真係引牛咁 !

今日終於跌穿了18000，不過大部份時間都幾橫行，無乜波幅，依家日日都係咁，已經見慣不怪。如果有朋友o係穿18000開左淡倉，咁上返18050的話最好走左先，吉倉者其實依家開淡倉都唔算係好高風險。睇圖的話依家穿左179，並受制緊10/21日最尾支陰燭底部，短期仍然偏淡，可望17750左右。如果真係跌到落去，穿埋17700還好，但如果遇到有大反彈就要走，大反彈意思大約 100 點既反彈吧。都係o個句，牛熊會比較蝕D，因為尾十五分鐘先彈的話就無仇報，所以如果過夜的話要好好考慮依個風險。

如想做好，我都係維持穿18330，因就算穿18000都唔代表已見底，除非o係18000做到多次頂，但到時先算啦 !

另外還需睇RSI條三底阻力，掂到有回升就食糊。而所有Trade都係，食左糊之後再等下一次機會，唔好中途追。切記 !

11月23日市前分析

大家好 ! 依三日既市真係悶到死左 !
睇返日線圖，已經係連續第三日十字星喇 !
突竟幾時先有突破 ?!

其實都無乜好講，都係睇返穿18000做淡，穿18330做好。
不過可以睇睇RSI做左三頂，會唔會遇三頂回落聽?! 聽日自有分繞...
不過值得一提既係聽日收市時條紅色降軌就落到去18600了!好友就快等到了 !HAHA...

我自己仲楂住左隻熊，我既忠旨係，入左，未見勢色唔對又未到止蝕位都唔會放住，
依樣係我買股既規則，所以唔洗問我點解仲唔放了 !!

今日都係閒吹........聽日睇下有無咩變化再分析啦 !!!

11月22日午市分析

大家好 ! 股市就係咁，未到最後一刻，你都唔一定賺硬。
今朝竟然係平開，之後仲要倒升過，不過最終都係被 330 橫線壓住。
或者會有人問，咪穿左330囉，仲講咩 330 呀 ?
我o係度解釋一下，330數字係死的，穿數字係無意思，個圖形唔穿，無論穿多十幾廿點都唔係穿，或者可能大家好混淆，但只要你睇得多你就會明我講咩。

睇返圖先，今日先黎個分鐘圖，因今朝出左去見客，無畫過圖，所以好乾淨，哈哈。
但係我主要想講既係今日DH o個枝燭，佢係掂一掂橫線後同一枝燭跌返落黎，之後連帶幾枝陰燭插落去，依個就係好明顯既數字穿但圖形唔穿既例子。

睇返小時圖，穿18000可開淡，其實今朝咁大枝陰燭o係18330已經可以開淡，目標先睇17900、17750。我特別圈起左幾個地方淡友要留意，RSI再遇三底，會唔會有反彈 ? 750會係我既食糊位，因為之前已做過兩個底，我預期佢會彈一彈，但唔知彈幾多，要到時出圖形再決定。而開淡後止蝕放O係綠色降軌，下午第一個鐘O係18270....或者你想的話可擺返O係330。不過我覺得如果再衝多次330就應該會真穿了。要小心。

想做好都係望330~350啦~ 穿左睇500，止蝕擺返O係330先都得，因暫時未有圖形配合。

11月22日市前分析

大家好 ! 今日個市真係升穿DH，但無上18330，我當時都諗唔明，仲以為實會HIT到我止蝕位，之後再睇睇個圖，終於發現原來漏左條線o係18265左右，真係差一點細心呢 !
依家外圍咁樣，希望無朋友渣好倉過夜 ~~~ 一日唔升穿條紅色降軌，一日都唔好好倉過夜 !!!

好了 ! 睇返圖先 ! 小時圖無點變過，上下都係受制裂口阻力，
想做好既，都係等穿330，上望500，穿左再定止蝕吧。
想做淡既，穿18000，下望17900、17750，止蝕仍然係擺返o係330。
如果聽日開得太近目標位，照舊要等下先，無辦法，近排真係太多裂口後橫行，一定要過夜先有得食個浪，但過夜風險太大，o係無點數渣手下過夜等同賭大細。

如果已做好者，可先睇穿唔穿17750先決定止唔止，穿左一定要止。
已做淡者，一開穿17900的話可以由佢游下，18000點止賺，目標睇17750，我估17750會有點反彈，但唔知會彈到邊，所以短炒者可以試下搏，5格做止蝕。

聽日要留意RSI三底，已試過多次到位反彈了，做好做淡都要留意。
另外亦有可能會到下降通道底，要睇睇係咪有反彈力，點都好，淡友係隨時準備食糊的呢 !

假若真係穿17750，咁就會睇17400了 !

11月21日午市分析

大家好呢 ! 首先預測失敗，今日又係一開就到目標位 ! 個市真係....................無言=.=

但我最終都o係1808x沽左一注，睇17900，之後到17750。
會定o係穿18350做止蝕，或者新劃o個條綠色降軌做止蝕。

做左淡既，需要留意RSI三底位置。另外已經到通道底部，水位可能已經無咁多，同埋中間既區間好少，所以可能會比較chok，所以唔係太建議過夜了。
吉倉既，如果跌穿18000的話可以做一注，先望17900，之後就17750，但如果係買動物的話要小心最後15分鐘會上返18000。我諗想穩穩陣陣既話，都係等穿17750吧，依個位可以話係整個反彈浪既起點，之前亦做左兩次底，所以穿左就應該會再黎一輪急跌。之不過會唔會係今個月跌穿呢 ? 唔敢講 !!!!

想做好，我諗上穿紅色降軌做先安全，依家位置大約o係18900。
想短線一點都可以穿今日DH做，先上望18330 (但要留意住條綠色降軌)

11月21日市前分析

 

 

大家好呢 ! 首先O係度講一講，我其實大部份時間都會o係UWANTS出POST，網址係 : http://www.uwants.com  <投資> -- <股票> -- <牛熊攻略>

當我入市時通常都會出post講，DT除外，不過我好少DT，始終係打工仔呢。哈哈，不過如果當日好好炒就除外。如果有興趣的話都可以去睇下。

星期五曾經有一刻下穿過18350，不過分鐘圖係同一枝燭彈返上去，我講過數字穿係無意思的，一定要成個圖形穿，一去不回，就算回都唔穿返上去的。

遇大位唔穿就當然彈啦 ! 都仲要彈得幾勁，10分鐘左右就已經彈過百點，就睇下星期一有無機會上穿18500吧 !

小時圖仍然係整固圖形，想做好同做淡都係O個兩個位。

做好的話上穿18500可做，上望18650、18700、18900

止蝕可以擺返o係18500。

做淡的話仍然係下穿18330可做，下望18100、17900。

止蝕都係18330啦 !

另外自己有少少主觀預測，跟據之前整固向下圖形既經驗，應該會先上18650先再跌穿18330，就睇下係咪真係咁行 ?!

另外有朋友想我整張美股圖出黎，我當然係有求必應啦 !

順便分析下個走勢啦 ! 

前日美股跌穿左等邊三角，尋日剛做埋後抽，依個圖形真係靚到絕，

照計應該會先挑戰11620，穿左就會落11400了，因為破左位既關係，所以應該都係向下了。短期底可能會o係11300-11400，之後就要等會有咩圖形出先?

11月18日午市分析

大家好 ! 近期個市真係易炒左，唔再係一裂口就到目標位變左無水位，線位又分明，我等都等得有價值。哈哈 !
今朝開市開o係18500以下，之後試過上穿穿唔到，依個動作叫後抽，所以知道穿唔到之後就可以開淡倉，目標睇18350。到位唔穿即走，咁就穩穩陣陣袋100點了。

之後又點呢 ? 如果開左淡倉未走既朋友，止蝕位可擺o係18500，即今日DH，或者唔甘心的可以擺o係18650，穿左就一定要走，但我偏向穿500走，一來唔會蝕好多，二來已經到左目標位350，唔知會唔會係底 ?
而吉倉既朋友，食左糊或錯過左機會既都係望18350啦，穿左可以沽，先睇18100，穿埋就到18000下降通道底。如果想做好，最穩陣都係等升穿紅色降軌先，當然DT的話穿185都可以做，先睇18650，但止蝕要定o係18350，有點遠呢。
小心尾市先穿大位引你入，尤其係買牛熊的，如果尾15分鐘上返去就無仇報了。

做淡既朋友有一樣野要小心，RSI係持續背馳，可能會好似尋日咁彈一彈呢。
不過暫時做好過夜都唔係好建議住，始終仲係o係下降通道行緊一浪低過一浪既走勢。
祝好運 !! ^^

11月18日市前分析

大家好 ! 我本來已經寫左一次，唔知點解SHOW唔到...返到屋企先知....T_T

今日午後升穿50天線時有無做好呢?! 最後真係衝上18900，但可惜無以為繼，
之後就算o係18850平都有返七八十點執呢 ! 之後再跌穿50天線後再一次挑戰綠色升軌，又唔穿，又上返去，基本上都係o係D支持同阻力之間來來回回咁行....

暫時黎睇幅圖都算係明確，想做好的話，上穿18900可先做一注，再穿19000就再多注，之後就應該會上去挑戰條紅色降軌，聽日第一個鐘會O係19180左右。如果上穿降軌就會睇黑色升軌位置(FH : 19460左右)或19500裂口阻力。而止蝕可以擺返o係條新畫既紅色升軌。
但條升軌只係用黎止蝕用，並唔代表穿左可以開淡。

如果想開淡倉，就要等穿左綠色升軌先開得淡(FH : 18680左右)。穿左的話先望18500，再穿的話就望18350左右。止蝕仍然係紅色降軌，或者睇下跌穿後點行先再決定止蝕位，可能到時有條新降軌都唔定呢 !?

暫時幅圖睇黎都係反覆向下呢..........!!!

11月17日午市分析

咁快又出分析了 ! 相隔都唔洗三粒鐘..haha
暫時個市都係受制條綠色升軌，如果到依家都係吉倉想做淡既，都係等跌穿綠色升軌先開啦~
目標係185，之後183。升軌午後位置約o係18640左右。補充多一句，穿軌意思唔係穿數字，穿數字係無意思的，成個圖形穿先算，例如如果下午落18630之後又彈返上去，可能只係條軌畫高左丁屎咁多，依樣野要留意。

另外如果好似我咁做左淡未放既咁點呢 ? 咁就先睇返日線50天線做止蝕。
其實點解咁近去做呢 ? 因為後市我暫時唔睇得咁淡住，大家可見RSI我畫左三條線，前兩條係俾個例子你地參考，最後O個條就係今日同尋日低位，好明顯依家RSI行緊背馳，有機會18500係暫時既底，所以如果穿50天線一定要走，做唔做好就悉隨尊便了。

如果想做好的話止蝕都可以擺O係綠色升軌度，我當穿50天線後做好，都係100點止蝕，風險亦唔算大。目標可睇18830~18850左右...再上就係189、190。

暫時黎計其實不宜入市住，尋日食飽左既朋友都可以休息一下再等機會，而如果陣間 HIT到我個止蝕位，我都會抖一抖先 !

11月17日即市分析

大家早晨呢 ! 第一次O係度同大家講早晨，哈哈哈 !
尋晚有點事出唔到分析，今朝又肚痾，攪到依家先出得 !
今朝期指一開市18500，差D嚇親，但之後就好快升返上黎，都好 ! 咁做好做淡都可以安全D。

我今朝O係1868X依D位加左注熊，原因係我搏佢升唔穿18700
如果做左淡未放既，都可以唔洗放住，止蝕可先擺O係日線圖50天線(18760左右)
都幾安全。吉倉既想開淡都一樣啦，但穿左最好走一走先。
而目標可先睇今日DL 18510，穿埋就睇18350左右，不過要留意RSI會唔會遇三底位有反彈，到住盡量都食左先。

想做好的話，穿日線圖50天線可以小注做好，但其實唔係好建議做，因為無一條比較明確既止蝕位，咁只好將止蝕擺返o係50天線啦，穿左最多蝕手續費。目標可先望189，之後190。

11月16日即市分析

今日下午有啲事忙，所以無出午市分析，現改為即市分析補數 (雖然已經三點 ! haha...)

今朝AO時段上穿左194，不過好彩既係開市前急回返入通道，所以無入到牛，
之後就一跌殺去192，穿埋我都唔係第一時間入，最後落到去19175左右我覺得已確認係破左位就入左熊了，之後一直殺落去19000、18900、18800......今日最低位係18709，亦算係到左既目標價，所以已經放左了，叫做贏返一仗吧。

如果未放既朋友又點做呢 ?
我覺得確實有點膽搏膽，點解 ? 先睇小時圖，好明顯19700支撐住個跌勢，但就算跌得穿，對落仲有條升軌，而條升軌大約o係18650左右，再加上RSI呈現超賣，要回返上少少係好正常，o係可見下跌水位唔係好多時，都係有食好食了。
當然如果你想長擺都得，可以以19000左右做止賺，想再擺耐d就以條降軌做止蝕或止賺，依家條降軌o係19300，隨時間而下，即係越耐唔穿越著數。

如果想做好，都係睇返條降軌啦，即係話暫時都無位做好，要等 !
如果你想搏反彈都得，但最好細細注，因為都係買大細。

11月16日市前分析

今日午後DL後果然衝落去試192，可惜只穿少少就已就要彈返上去
我就係睇佢唔穿所以都放埋隻小小熊了。
但我放熊無非唔想再渣過夜，並唔代表我睇好後市。

暫時幅圖看來已經明朗好多，有降軌，而因為今日做多左個底，所以條升軌我有少少變動，總之兩邊都有得做了，
先睇做好的，好明顯由20100一直拉落黎條升軌係壓住港期，即係升穿左的話，可以做好，
目標可先睇195~196，止蝕位可擺睇條大升軌。
聽日降軌第一個鐘位置約o係19400， 升軌第一個鐘約o係19200。

而做淡都一樣，穿升軌都可做，目標先睇19000、50天線(18800)，如果穿埋既就睇18700。
止蝕同樣擺返o係降軌。

因為升降軌都會隨時間而行，只要開倉後時間過得越耐唔穿軌就越著數，風險亦越低。
但如果即日收返入通道就要小心了。

我覺得個市快要爆邊，所以就算今日我睇淡都放左貨先，以免睇錯市。
聽日希望能如願爆得到，我相信離開依個區域後就會好炒好多架喇 !

11月15日下午分析

今日都係一樣，裂口後橫行，到底仲會維持幾耐呢 ?
今朝開市俾條20天線頂住，依家睇黎又想試多次，穿左的話就會試今日DL，如果穿埋DL就應該會落19190左右試裂口阻力，穿今日DL其實可以開淡試一試，但如果回頭就要小心，有食好食，而如果穿晒兩條橫線就會試黑色升軌，午後第一個鐘約O係19100左右，隨時間而上。
穿左就更加好啦，穿唔到有明顯反彈就可能要閃人。

想做好的話，升穿DH都可以做了，當然都係最好一去無回頭啦，有回頭就要小心。
目標可先睇19500，之後19600。

即市黎計，唔好炒就緊架喇，睇下午後會唔會好返少少 ?
依家係破位向下格局，暫時仲係睇淡，要真正睇好的話，至先穿196先得!!!
而依家看似想繼續落呢 !!! 哈哈....

不過都係O個句，O係咁CHOK既市況，唔好太搏，有食好食，唔太建議過夜並控制注碼。

11月15日市前分析

個市又係咁，今日淨係得午後跌穿升軌O個個浪叫做食得下
其餘全部魚骨 (十字星)，難炒到嘔。
波幅太少既市當然最好係唔好炒啦，但如果硬要想炒，我建議炒期吧，牛熊俾莊食價食到暈，唔著數。

依家每日都係KEEP住日升日跌加裂口後橫行.......睇外圍依家叫有得跌下，即係聽日看來又係裂口幾百，之後係咪橫行就不得而知了。(看來都似係)
睇返小時圖，我畫左條上升軌道出黎，個市好大可能係行緊依條上升通道，而聽日底部會O係19050左右，就睇下聽日可唔可以落到依D位 ? 如果落到去，彈一彈，再跌穿，咁就真係正了!!!^^
對下的主要支持係 19200、19050、19000、18885、50天線、18700
今日未開淡倉既，想追淡的話就要先睇聽日開咩位，如果開19200以上的話，等佢穿就可以睇19050，但如果裂口太大，O係192同19050中間，好明顯又係無得追，追的話升穿192就要止蝕了。

另外如果係開192以下，之後升穿192的話都可以小注做好，可用192做返止蝕。

我諗聽日唔會高開吧? 所以高開既假設唔講了，真係高開先再補充啦 ! HAHA.....(懶....)

近期仲係好CHOK，切記量力而為 !

11月14日午市分析

今日又高開五百，之後又係橫行，家下大戶淨係玩裂口，暫是七日裏有五日係十字星，
真係一D位都唔俾散戶食，夠晒絕 !!!!

小時圖個頂俾11/8燭身開市價頂住，而RSI做左三頂，即係如果想做好， 升穿今日DH可以做，可先望19800，期後19900。止蝕擺返o係19660，穿左上去落返黎的話當打和，要走。
做淡的話穿19500可做，可先睇19290~300 ，之後再睇19200。
止蝕都係，上返500要走，當打和。

日線圖呢，雖然高開五百點，但MACD(DIF)有減無加，呈背馳，暫時仍偏淡。

依家每日都只係裂口開，開完唔行，依D市基本上係無得炒過夜，我相信一日唔離開依個區域，一日都係咁既走勢，所以過夜就真係免了，而DT的話要食幾十點都未算難，但大浪就真係無，所以都係O個句，要控制注碼，暫未有方向前不宜太搏。

11月14日市前分析

大家好 !依兩日心情麻麻 ! 一來工作做到好攰，身邊事亦不算如意 ; 二來俾人追擊既感覺唔係太好受。不過我知道有好多人都撐我的，多謝^^。哈哈.....已回復心情了。

星期五外圍又升，美國仲要升二百幾，個市真係上上落落得好緊要，
每日都係俾大戶食裂口之後牛皮，完全唔留位，真攞命。
所以o係依個區域真係最好唔好過夜，o係完全無方向之下，真係同賭大細無乜分別。
o係未有方向之下，亦應控制注碼，今個月暫時都係難炒月。

日線圖黎講，暫時o係50天線同100天線之間行緊長方形，即係等爆邊，咁等佢爆邊先順勢做啦。

而小時圖黎講，星期一高開的話可先注意條藍色三底升軌，上到去但穿唔到並回落，咁好大可能只係破升軌後既後抽，可參考第一線綠色升軌，跌穿後直落17000，之後回升返去升軌並被升軌所制，之後跌穿裂口直落16100。
但係咪o個時沽呢?! 都得，但穿左入去要止。
升軌星期一第一個鐘o係19410左右....

但做好做淡都好難做，做淡會比較著數少少，因對落既支持位都見得七七八八，水位係比較多。做好就有重重阻礙。
當然又係o個句，想要穩陣....忍手，等離開依個區域後先買最好。
如果你有時間，可以DT，至少唔死得人，但係如果係牛皮的話最好乜都唔好做。

即市一分鐘分析

今日個市真係幾好炒，D位一穿就有反應..唔知幾時再機會。

今日有好多位都可以入，大家試下參考下啦。
又可以俾大家睇下我如果平時做DT係點樣排格仔法
(我通常破位第一枝轉色既觸做止蝕或止賺)

1. 穿橫線，沽。
2. 穿升軌，沽。
3. 穿升軌，沽。(損手)
4. 穿降軌，買。
5. 穿W橫線，繼續渣。
6. 穿降軌，沽。(損手)
7. 穿M形橫線，沽。
8. 穿圓底橫線，買。
9. 頭肩底，穿頸線，買。(不過第二枝係陰燭，要輸呢)
10. 穿下降楔形，買。(平手)
11. 穿升軌，沽。
12. 穿M形橫線，沽。
13. 穿下降楔形，買。
14. 穿圓頂橫線，沽。
15 穿降軌，買。(依個大浪好食到嘔)
16 雙頂後穿橫線，沽。
17. 穿升軌，沽。

收工 !!! ^_^

有意見可以隨便提出呢 !!!

11月10日午市分析

大家好 ! 今日我有啲唔舒服，所以長話短說了。

今日主要係受尋日頂位所制，所以19200暫時做左個平頂，
小時圖綠色降軌已繼續向下壓(19250左右)，如果午後仲係穿唔到上去，後市向下既機會頗大。升穿上去的話，就會上三底升軌19350左右，隨時間向上移。
假若上到三底升軌而有明顯回落，好可能係後抽，想做淡既可留意此動作。
若要穩陣做淡既，都係跌穿50天線先。
升穿三底升軌就要走人。

而日線圖已呈現背馳，購買力已減弱。
但仍然有位做好，升穿200可做，但要留意綠色降軌阻力
止蝕可擺返O係200或19000....

今日睇返分鐘意，都幾好炒，兩個大浪都唔難食，可惜我病了~~~T_T

天氣已經開始轉冷了，大家要穿多件外衣啊 !!!

11月11日市前分析

午後又係尾市跌穿支持位，插左百幾點又彈返上黎。
又係同一招，最後15分鐘上萬九。炒期...你走得到，如果玩動物，只能坐以待斃。
所以下午先話唔好過夜，就算過夜都唔可以大注，依家個市真係chok到你唔信。(雖則我有隻小小熊)
依家睇返外圍由跌轉升，都升得幾勁。 究竟係咪輪商想殺盡牛熊既技倆 ?
我聽聞基金都唔再長渣，都係玩短炒，會唔會就係因為咁，所以個市完全無方向呢 ?

睇返圖，明明已經走出19000~20250既整固區，點知尾市又要走返入去，
如果聽日高開，我估計聽日都係同依幾日一樣，裂口後橫行，
看來又要忍手了。

聽日重要阻力會o係19250降軌和19430三底升軌，其後就19500、19600裂口橫線....
而重要支持會o係19000和今日DL18880左右 (大約50天線位置)
入返依個區域，無論做好定做淡，我都唔係好建議了，我諗最好休息一下，等大市有明確方向先再入市。

反而DT都可以食到三四次大浪。就好似今日下午其實係幾好炒的，做左兩次買賣賺左十格，雖然唔多，但總好過過夜賭大細吧?

11月10日午市分析

今日最終一開市就裂口跌900點，一開就係19000橫線
我真的不能不服大市，已經唔記得左係連續幾多次，一開市就係我既目標位(支持或阻力位)
真係俾少少我追都唔得，勁 !
最後我都o係1905x左右牛左食佢五格。
就算係DT都係得剛開市o個下好炒，之後整日牛皮，波幅得o個四五十點，又係無得炒 !

尋日做左好既朋友，今日一開就跌穿晒位，但未跌穿19000，如果唔甘心的話，可以睇埋依個位先，但最好都今日好走了，順便最好休戰一排回一回氣，等自己冷靜返落黎先 !

好了，先講今日個圖，上面既支持位就一下大裂口就變晒阻力，暫時小時圖都係19000剛頂得住， 穿19000可睇18700，不過即日落還好，如果尾市先黎跌穿就要小心，因為依家好興尾4:00~4:15先黎做野，如果尾15分鐘又升返入19000咁就麻煩，炒期指還好，炒牛熊真係唔建議過夜了。另外如果上返三底升軌有明顯回落都可以開淡。小心小時圖rsi已經係超賣。

想做好的話，有兩個選擇，一係再落19000搏反彈，止蝕擺o係19850，但向上目標先看今日DH。一係上三底升軌後留意下係咪有阻力，受阻力後再升穿可做好，可先睇19500。依家三底升軌位置o係19320左右

11月10日市前分析

今日最後又係一個悶局，升穿升軌後都無100點，得50點執，我淨係做左依次買賣。
波幅太小了。
最尾我想佢出現既都無出現，就一直o係20000附近橫行，又係四點後先黎精彩，
仲要跌穿埋DL，所以19000-20250之間點入市呢 ? 日升日跌..........
本來仲有二百多點就可以脫離依個區域，點知又跌返返入去，我仲要繼續忍手呢=.=

依家就咁睇外圍，黑期都急瀉，ADR仲誇，跌成千咁制。
我真心希望唔好跌咁多，因為我知有好多牛仔會走唔到，甚至有好多人都入左正股
....坦白講，個心好不安 =.= (雖然我吉倉中..)

講返圖先，我剛剛發現左樣野係之前無留意到的，條100天線原來係個跌市既起步，
依家再遇100天線而升唔穿，會唔會係另一次大跌既開端呢 ?
如果今日做左好未放既，聽日高開的話當然係睇100天線啦，而止蝕可先睇幾個位。
紫色升軌，第一個鐘19800 ; 之後三底橫線19600 ; 之後三底升軌19300，視乎聽日o係邊個位開，你想o係邊個位做止蝕。基本上穿196都真係要走，而三底升軌我覺得係最後防線了。

做左淡既，止蝕都係擺o係100天線啦。而止賺的話，可先睇頭先講o個三個位會唔會有明顯反彈，有的話都可以走左先。如果三個都穿晒就睇19000。之後到18700。

而吉倉既，想做好既都係同今日一樣，穿100天線可做，睇20250。
而想做淡既，穿19600可做，下望三底升軌，之後就19000，18700......(講左好多次了...haha)
如果聽開市裂口好大，睇住會唔會後抽~ 太近支持位的話最好都係睇穿先追。

其實無論升又好跌又好，開始有空間去入市了，即係整固都差唔多完成。
雖然依個整固期間D大升大跌都食唔到，不過機會多的是，並唔係每個浪都可以食得到的，
尤其係整固浪。

P.S. 如果有人真係想清楚了解咩係TREND LINE(線位)，突竟點畫 ....等等等..........我可以試下開個班講解下，但前解係係咪真係有人想學我先會攪，始終攪依D野都好費神下。如果有興趣的話可以pm我，亦可以send email俾我 (treekc169@hotmail.com)，亦可以o係依樹留言。

11月9日午市分析

今朝一早就高開四百幾，一開開O係日線圖100天線附近，又係無位入市。

如果今朝開左好倉既朋友，請記住如果開O係阻力位附近，千祈唔好追，真係好危險的 !

升穿唔100天線，係咪代表個市已見頂呢 ? 又未必...

首先睇下會唔會跌返落尋日升穿既降軌 ? 跌返落去再有明顯反彈的話，咁即係係後抽，有機會再向上挑戰100天線，但如果穿返入降軌就要小心了。

做左好既朋友可以以小時圖紫色升軌做止蝕，收市前大約O係19780左右。

如果做左淡的話，穿100天線就要走了!

如果好似我咁吉倉既又點呢?!

即日黎講，升穿分鐘圖既降軌可以追牛，但可能只有100點左右升幅。

如果想渣牛長一點

1.等跌返落綠色降軌(19890左右)然後再升穿即市降軌。咁可以睇返100天線

2.升穿100天線追入，睇20250

3.升穿20250，睇20450

如果想熊，暫時真係無乜位，要等~~

 

11月9日市前分析

今日除左上午食左轉升浪之外，整日都超忙，無睇過個市乜濟
不過聽日都差唔多九成高開了，因為今日整日既下降軌o係尾市被破位，
按波幅計算，聽日應會升到19930左右，但會唔會再上就唔知了。

暫時圖形都無乜變化，都係睇住o個幾條線位做野，但小時圖新加左兩條線，
虛線係未確認既升軌暫可以不理，而19600則會係一條幾重要既橫線，因為試過三次都跟唔跌，如果聽日有唔錯升幅，依條線更加係升市既起步，所以想做淡，可先睇依條線。

而想做好的話，先睇睇聽日開咩位，裂口高開19950以上，咁最好等佢升穿日線圖既 100天線先做好，但我都係維持升穿20250先做好會好D，反正升得穿的話上面仲有好多水位。如果係19950以下，咁就先睇睇19930~19950依D位會唔會受阻力回落後整固再上，如果係咁行的話就可以破位後開好倉，先睇20100~20150 (或日線圖100天線)

暫時都唔好睇得太好太淡，因為一日未穿19000~20250，一日都仲係O係整固區，仍然會好CHOK，千祈唔好亂咁過夜，尤其要控制注碼。

11月8日午市分析

到左今日，都仲係未有突破，悶到傻左。
但係小時圖既線位越黎越穿，突破既時間不遠矣。

暫時小時圖第一條降軌o係19930左右，升穿的話可以睇20100，之後到20250。
但做好要小心，因為macd己轉負數，可能開始轉弱都未定，所以做好後要睇返到線位個回落速度，隨時止賺或止蝕。暫時做好的話，無一條可靠既止蝕位，咁可以以即日升軌做止蝕啦 !

另外想做淡的話，可睇一睇小時圖綠色升軌會唔會有支持，如果去到之後彈一彈做整固再跌穿的話就完美了。午後第一個鐘o係19640左右，隨時間而上。如果係有支持並跌穿，可望19530裂口阻力同綠色下降軌，再跌穿晒的話就可望三底升軌，午後第一個鐘o係19200，隨時間上升。

即市的話，跌穿條升軌有可能再試DL呢.

11月8日市前分析

近期市況都真係幾悶~
好似連大戶都唔知做邊好咁.....=.=
不過睇返分鐘圖，今日算係幾好炒，尤其係尾市跌o個浸~
可惜我只有時間食到早上升o個浸......打工仔....無法=.=

今日算叫做有少少突破，小時圖行左個直線向下突破，
尾市本來想沽佢過夜，但無奈用電話入得acc黎，都已經收左市。
但返到黎睇返圖，原來臨尾收左o係綠色軌度，擲界呢
而小時圖都仲未跌穿綠色軌，嗯....真係不知是福是禍了 ?

依家想做淡的話看來唔洗等穿19000了，穿綠色降軌同埋裂口阻力就可以做，即係話穿19500的話就可以開沽了。第一站先睇下面條三底升軌，聽日第一個鐘o係19190左右，穿埋就可以睇19000了，再穿就18700..........當然要留意反彈力道。止蝕位暫時只好擺o係對上條降軌，聽日第一個鐘o係19960左右。

而想做好的話就至少要升穿19960o個條降軌，但之後得返60水位又一條降軌，再穿埋就應該會挑戰20240双頂。如果係咁行的話，o係依個區間可能會幾chok。所以我都係維持住升穿20240先做下好友!!!


所以我比較希望佢跌，一來近好多，二來水位多好多 !!!! 嘿嘿...

11月7日午市分析

今朝都仲係橫行整固當中，一開市曾跌穿19700裂口，但果然受制綠色下降軌 (Hamline)，跌唔穿，就升返上上一條阻力。睇日線及小時圖，由8/1拉落黎的下降軌看來發揮到作用。
不過就算係日線定小時圖，我諗大家都見到入面既線位真係多到針都插唔入，
所以我先話19000~20000會好CHOK !

如果想開淡，最好就穿晒兩條日線既綠色軌，第一站先睇19000。
底O個條綠色軌O係19200左右。
但當然最好都係穿19000先做，睇18700..

如果想開好，穿藍色降軌可以試一注，上望20100。降軌大約O係19980左右。即當20000啦! !
穩陣點升穿20250先開會好D...

11月7日市前分析

美股o係星期五先跌過二百點黎，之後又收窄到得返60點，美股港股都一樣咁chok呢 !!

暫時睇幅圖，港股有望挑戰20100 - 20200，但難言穩陣。不過想做淡，要等，依家依個位不宜亂沽。想做淡的話要等佢穿197，之後可以睇195，但要留意綠線降軌既反彈力道。
想安安全全做淡，至少要跳穿19000先可以，第一站睇18700，再跌穿就睇18350。
而做好的話，升穿20100可以試一注，升穿20220可以加注，暫望20500-21000。
另外日線圖有條線位o係20050，但未確認。

暫時係整固圖，無乜方向，不宜太搏。